呢首歌我相信唔需要多作介紹，大家都係知道係咩黎。
事先聲明，其實成首歌並唔係我一個人寫哂，當中亦歸功不少創意無限既高登巴打(可能有絲打掛)，亦要感謝子如巴打主唱，以及用心極速製作MV既巴打們。
由於寫 呢首歌個CHORUS之時正正係小弟脫離兵役之時，所以根本就唔預計首歌會有咁大迴響，不但上左網典，佔左最神級二次創作選舉既一席位，去年更加有BOARDGAME以同名推出一個體驗女神兵仔既遊戲，影響後世之深，事前根本無諗過，猶幸首歌受網民歡迎，所以小弟個朵都叫做有d巴打認識。
延伸閱讀:
《 條女很清楚收兵好過嫁人 》 港版Board Game 30分鐘體驗當兵感覺
好喇，消費完首歌，係時候講返正題。到底有d咩因素，令一首膠歌/口水歌容易令人記住，一記就記你幾年呢?
我寫《條女很清楚…》之時，同過一個女仔發生左d唔開心既事，總之某程度上就係覺得佢成日同我好close但事實上佢又唔係對我有feel，想行埋d就被拒絕之類，從心態上出發，當時既心情寫呢首歌，正好適合。
條女很清楚收兵好過嫁人 真的身份不過女神
只要女神未夠開心 便集齊萬馬千軍
好聽D佢當係熟人 衰D講係用黎犧牲
落力辛勞過 亦不能步近
一首歌成功之處，至少，Hook Line要寫得好，咁咩係Hook Line呢? 即係個中心思想，例如中學時代作議論文，進入論證陼段你係一段既開頭必然係寫個論點係乜，咁廣東歌就無作文咁複雜，無需要3個論點，只求一句你記得既歌詞，而呢句歌詞，學我師父咁講，愈似原詞愈好。
用其他比較更出名既歌黎做例子，相信呢首好難未聽過：
「我是一個西伯利亞人 冬天的冠軍」，唔好睇少呢14個字，因為係呢14個字入面，完完全全地利用左大家對《失戀王》既認識去建築自己個主題
每段戀愛都會認錯人 失戀的冠軍
我是一個西伯利亞人 冬天的冠軍
為方便大家閱讀，我用不同顏色去將呢首歌既Hook Line分拆成上面咁樣，雖然大家既詞性未做到平行，但結構上係完全一樣，既然大家對《失戀王》耳熟能詳，咁「我是一個西伯利亞人，冬天的冠軍」就十分容易入腦。
咁講返自己首歌，其實道理一樣:
流水很清楚惜花這個責任
條女很清楚收兵好過嫁人
純粹學術討論角度，呢一句Hook Line比西伯利亞人更加利用到大家對舊詞既認識，神奇之處係《落花流水》都係寫緊類似既野，只係手法上融情入景，但二次創作當然唔會咁玩，開門見山從來都係最入耳既方法，而「條女很清楚收兵好過嫁人」呢一句，結構同舊詞一樣之餘，係詞性唔一樣既相同結構當中，其實係用返同一個韻(「這個」VS「好過」，「責任」VS「嫁人」)，所以，不難解釋個標題係有聲，呢個亦係不少歌曲成功之處。
Chorus之中，其實《條女…》亦都沿襲舊詞既結構
流水很清楚 惜花這個責任 條女很清楚 收兵好過嫁人
真的身份不過送運 真的身份不過女神
這趟旅行若算開心 只要女神未夠開心
亦是無負這一生 便集齊萬馬千軍
水點蒸發變做白雲 好聽D佢當係熟人
花瓣飄落下游生根 衰D講係用黎犧牲
淡淡交會過 各不留下印 落力辛勞過 亦不能步近
一般既改編歌詞，通常都盡量避免帶子原詞影子，但改膠歌，的確，愈似愈好，基本上成個CHORUS都係跟原曲一樣PATTERN，只要原曲夠HIT，改出黎既野有文有路，包無死 。
至於最後一段CHORUS，的確唔係我寫，唔係話我要SHOW OFF，但一睇歌詞就知咩事:
條女終一天清醒遣散眾人 天兵身份急降蟻民
只要女神又有心癮 霎眼期盼再轉生
偏偏一走已是罪人 她都只會渴求新軍
再次孤獨了 害傷痕淚滲
但是兵役過 在心頭怒憤
文句不順已經出事，去刊中間直情連結構都保唔住，難怪身邊有D朋友都會問，「做乜最後個段咁既?」
「咁我返到屋企個MV都出左世，唔通要人再改過咩?」
下一集講下用Verse做Hook Line既膠歌
最後送多條片比大家，首歌正正係我師父所寫，若果對覺得粗言穢語好多Dirty既，請係按下讚後點擊上一頁。
其他填詞技巧:
3 thoughts on “【填詞技巧】神作是如何煉成的? 惡搞歌大解構 (上)”